Бу күннэргэ Амма улууһугар “Күн сардаҥата” диэн ааттаах республикатааҕы чинчийэр экологическай экспедиция үөрэнээччилэр кыттыылаах барар турар. Хас да оскуола кыттыгас тэрээһиннэрэ бэс ыйын 28-29 күннэригэр Бөтүҥҥэ үлэлээтэ.

Экспедиция иитинэн хас даҕаны бөлөх баар, олортон биирдэстэрин — гидробиологтары кытта билиһиннэрэргэ сананнам. Манна Уус Алдан Бэйдиҥэ оскуолатын үөрэнээччитэ Охлопкова Дарина, Дьокуускай куорат 2№-дээх оскуолатын үөрэнээччитэ Гуринова Милена, Амматтан Абаҕа оскуолатын үөрэнээччитэ Ребров Коля, Бөтүҥ оскуолатын үөрэнээччилэрэ Назарова Настя, Окоемова Ньургустаана, Амматааҕы лицей үөрэнээччилэрэ Уваров Влад, Кралина Камила, Лобанова Айта сырыттылар. Кинилэри кытта бииргэ Бөтүҥ оскуолатын биология учуутала Назарова Ида Иннокентьевна үлэлээтэ.

Бөлөх салайааччытын Дмитриева Валентина Иннокентьевнаны Саха сиригэр элбэх киһи билэр. Общественнай эколог, «Эйгэ» общественнай Киин дириэктэрэ, элбэх бырайыактар ааптардара. Мин устудьуоннуу сылдьан кинилэргэ волонтер буолуохпуттан билсэбит, наставникпыт. Валентина Иннокентьевна биһигини үлэҕэ бэриниилээх буолууга, төрөөбүт дойдубутун таптыырга үөрэппитэ-такайбыта.

Валентина Иннокентьевна: «Мин Аммаҕа 1996 сылтан Хотуйа үрэх уутун ыытыыга Ольга Петровна Иванова-Сидоркевич саҕаттан сылдьабын. Бииргэ үлэлэһэн, 2002 сыллаахха «Хотуйа» экопарка юридический статус ыларын ситиспиппит. Бүгүн «Тураннаах» күөлү чинчийэн кэллибит. Күөлбүт билигин туруга олус үчүгэй диэн биоиндикация түмүгүнэн көрдүбүт. Ол эрээри түмүк этиини уу химическэй аналиһын кэнниттэн этиэхпит»,- диэн сырдатта.

Бөтүҥ оскуолатын үөрэнээччитэ Настя Назарова “Дендрологическая характеристика территории экопарка Хотуйа” диэн теманан 5 кылаастан дьарыктанар. «Биһиги Иванова Нарыйа, Непомнящая Карина, Гоголева Дарина уонна Зарина, Неустрова Вика, Иванов Айдын буоламмыт 2020 сылтан “Научное лето” Өлүөхүмэтээҕи оҕо айымньытын киинин бырайыагар кэтэхтэн үөрэнэбит. Онно ылбыт билиибитин билигин туһанныбыт. Экспедицияҕа учуонайдары сирэй көрсөн, кэпсэтэн үөрэнэр ордук эбит дии санаатым. Маннык хоруй ыларга быдан туһалаах эбит»,- диэн санаатын үллэстэр.

Оттон Дарина Охлопкова: “Аммаҕа бастакыбын кэлэбин, экспедицияҕа эмиэ бастакыбын сылдьабын. Олус сөбүлээтим, наһаа интэриэһинэй эбит маннык сылдьар. Эрдэ олимпиадаҕа кыттар этим уонна “Сравнение воды в разных источниках” диэн үөрэтэ сылдьыбытым. Эһиил өссө да кэлиэм этэ. Бөтүҥҥэ бэҕэһээ наһаа үчүгэй билсиһии биэчэрэ буолбута. Оскуолаҕа фонтаннаахтар эбит олус сэргээтим»,- диэн кэпсиир.

Оҕолор санааларын истэммин олус үөрдүм, бу экспедиция улууспутугар саҥа бырайыактары, сайдыыны аҕаллын. Оҕолор чинчийэр темаларын сөпкө талан, араас таһымнаах конференцияларга ситиһиилээхтик кыттарыгар, ким эмит инники идэтин таларыгар бу экспедиция бастакы хардыы буолуо диэн эрэнэбин.

Акулина Иванова, Бөтүҥ

03.07.2024